ఆంధ్రభారతి - తాళ్లపాక అన్నమాచార్య కీర్తనలు - ఆచారవిచారా లవియు నే నెరఁగ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 367-3
సంపుటము: 4-395

తాళ్లపాక అన్నమాచార్య

రాగము: లలిత

ఆచారవిచారా లవియు నే నెరఁగ వాచామగోచరపు వరదుఁడ (వు) నీవు	॥పల్లవి॥
తపమొక్కటే నాకుఁ దగు నీ శరణనుట జపమొక్కటే నిన్ను సారెకు నుతించుట వుపమొక్కటే నీవె వున్నతుఁడవంట విపరీత విజ్ఞాన విధులేమి నెరఁగ	॥ఆచా॥
కర్మమొక్కటే నీ కైంకర్యగతి నాకు ధర్మమొక్కటే నీ దాసాను దాస్యము మర్మమొక్కటే నా మతి నిన్నుఁ దలఁచుట అర్మిలి నింతకంటే నవల నే నెరఁగ	॥ఆచా॥
బలిమియొక్కటే నాకు భక్తి నీపైఁ గలుగుట కలిమి యొక్కటే నీవు గలవని నమ్ముట యెలమితో శ్రీ వేంకటేశ నీవు గతిదక్క పలుబుద్దులు నేఁబొరలు భావనలేనెరఁగ	॥ఆచా॥