ఆంధ్రభారతి - తాళ్లపాక అన్నమాచార్య కీర్తనలు - వెరగుతో మరచితే వెనక లేదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 369-5
సంపుటము: 4-408

తాళ్లపాక అన్నమాచార్య

రాగము: గుండక్రియ

వెరగుతో మరచితే వెనక లేదు కరివరదుఁడే తక్క గతి యొండు లేఁడు	॥పల్లవి॥
ఆస విడిచినఁగాని యధిక సుఖము లేదు యీసు విడిచినఁగాని యిహము లేదు వాసి విడిచినఁ గాని వైపగు విరతి లేదు వాసు దేవ భక్తిఁగాని వరముక్తి లేదు	॥వెరగు॥
చలము మానినఁగాని సాత్వికగుణము లేదు పలుశంక వోకకాని ఫలము లేదు సిలుగింద్రియాల గెలిచినఁగాని త్రోవ లేదు జలజాక్షుచింతఁగాని సమబుద్ధిలేదు	॥వెరగు॥
దైవము కరుణనెకాని తగువిజ్ఞానము లేదు భావించి చూచినఁగాని బలిమి లేదు యీవల శ్రీ వేంకటేశుఁ డితడె దైవ మితని సేవించినంతఁగాని సిద్ధి మరి లేదు	॥వెరగు॥