ఆంధ్రభారతి - తాళ్లపాక అన్నమాచార్య కీర్తనలు - నీవు నాసొమ్మవు నేను నీసొమ్ము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 373-2
సంపుటము: 4-429

తాళ్లపాక అన్నమాచార్య

రాగము: లలిత

నీవు నాసొమ్మవు నేను నీసొమ్ము యీవల నీవెపుడు మాయింటనుండఁ దగవా	॥పల్లవి॥
హరి నీరూపము నాకు నాచార్యుఁడు మున్నె కెరలి నాపాల నప్పగించినాఁడు నరహరి నిను నే నన్యాయమునఁ దెలియను పొరఁబడి నీ కెందుఁ బోఁదగునా	॥నీవు॥
జనని నీదేవి లక్ష్మి జనకుఁడవు నీవె తనువులు నాత్మబాంధవము నీవె అనయము నేనెంత యపరాధినైనాను పనివడి నీవు నన్నుఁ బాయఁదగునా	॥నీవు॥
బహువేదములు నిన్ను భక్తవత్సలుఁడవని సహజబిరుదు భువిఁ జాటీని యిహమునఁ శ్రీ వేంకటేశ యిది దలఁచైన విహితమై నాకడకు విచ్చేయవే	॥నీవు॥