ఆంధ్రభారతి - తాళ్లపాక అన్నమాచార్య కీర్తనలు - హరిహరి నిను సకలాంతర్యామివి(ని?) ఆత్మఁ దలఁచుటే యోగంబు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 377-4
సంపుటము: 4-450

తాళ్లపాక అన్నమాచార్య

రాగము: గుజ్జరి

హరిహరి నిను సకలాంతర్యామివి(ని?) ఆత్మఁ దలఁచుటే యోగంబు శరణాగతరక్షామణి నిన్నే శరణనియెడిదే తుదిపదము	॥పల్లవి॥
నీయందే యీసచరాచరమును నీవే చరాచరమందు నిత్యమును పాయక వుండుట గని తలపోయుట పరమార్థంబుల సారంబు కాయము జీవుఁడు నీయధీనమై కలుగఁగఁ బ్రకృతియుఁ బురుషునిఁగానిటు మాయల ముంతువు మాయకుఁ జొరవని మతిఁ దలపోయుట సుజ్ఞానంబు	॥హరి॥
తనలోఁ బరతత్వపు నీవును తా నీపరతత్వములోపలఁగా మనసునఁ దలఁచుట వేదాంతంబుల మంతనముల సన్మార్గంబు ఘనమునకును మరి ఘనమై యందే కడుసూక్ష్మమునకుఁ గడు సూక్ష్మంబై యెనసిన పూసలలోదార మవని యెన్నుటె పరమరహస్యంబు	॥హరి॥
ఆతుమలోపల ఘనవైకుంఠము ఆతుము నీ వైకుంఠములోపల యీతల నాతల సరిగాఁదెలియుట యిదియే బ్రహ్మానందంబు శ్రీతరుణీశ శ్రీవేంకటపతి సేవారతి నిను నీ భజియించెద దాతపు దైవమవై ననుఁగావుము తలఁచెద మిదియే తత్వంబు	॥హరి॥