ఆంధ్రభారతి - తాళ్లపాక అన్నమాచార్య కీర్తనలు - ఎరిఁగీ నెరఁగదు యేమి సేతు మతి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 378-3
సంపుటము: 4-455

తాళ్లపాక అన్నమాచార్య

రాగము: వరాళి

ఎరిఁగీ నెరఁగదు యేమి సేతు మతి హరిదాస్యం బదియే సుఖము	॥పల్లవి॥
వెతలఁబొరలే ఘన విభవముకంటే అతి పేదరిక మది సుఖము గతి నెరవుల సింగారము కంటెను సత మగు తన నిచ్చలమే సుఖము	॥ఎరిగీ॥
పలుబాములఁబడు పగలిటికంటే తెలిసి నిద్రించు రాతిరి సుఖము అలమట గడించు నమృతముకంటే కలపాటి తనకు గంజే సుఖము	॥ఎరిగీ॥
పరపీడలొసఁగు భవమునకంటే ధరఁ బొడమని చందము సుఖము గరిమల శ్రీ వేంకటపతి నీకే శరణని యెడి నాజన్మమే సుఖము	॥ఎరిగీ॥