ఆంధ్రభారతి - తాళ్లపాక అన్నమాచార్య కీర్తనలు - ఏలవయ్య లోకమెల్ల యిట్టె రాము దీవెనచే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 379-1
సంపుటము: 4-459

తాళ్లపాక అన్నమాచార్య

రాగము: శంకరాభరణం

ఏలవయ్య లోకమెల్ల యిట్టె రాము దీవెనచే నీలవర్ణ హనుమంత నీవు మాకు రక్ష	॥పల్లవి॥
మొదల నింద్రుఁడు నీ మోమునకెల్లా రక్ష యిదె నీ శిరసునకు నినుఁడు రక్ష కదిసి నీ కన్నులకు గ్రహతారకాలు రక్ష చెదరని మేనికెల్ల శ్రీ రామరక్ష	॥ఏల॥
పిరుఁదు వాలమునకు బెడిదపు శక్తి రక్ష గరుడఁడు నీకరయుగముల రక్ష గరిమ నీకుక్షికి కరివరదుఁడు రక్ష సిరుల నీ మహిమకు శ్రీ రామ రక్ష	॥ఏల॥
వడి నీ పాదములకు వాయుదేవుఁడు రక్ష తొడలకు వరుణుఁడు తొడగు రక్ష విడువని మతికిని వేద రాసులే రక్ష చెడని నీ యాయువుకు శ్రీరామరక్ష	॥ఏల॥
నలువ నీగళ రక్ష నాలుక కుర్వర రక్ష అలర నీసంధులకు హరుఁడు రక్ష పలు నీరోమములకు బహుదేవతలు రక్ష చెలఁగు నీచేఁతలకు శ్రీ రామరక్ష	॥ఏల॥
అంగవు నీతేజమున కగ్నిదేవుఁడు రక్ష శృంగారమున కెల్లా శ్రీ సతి రక్ష మంగాంబునిధి హనుమంత నీ కేకాలము చెంగట శ్రీ వేంకటాద్రి శ్రీ రామరక్ష	॥ఏల॥