ఆంధ్రభారతి - తాళ్లపాక అన్నమాచార్య కీర్తనలు - చేకొన్న భక్తుల పాలి చింతామణి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 380-3
సంపుటము: 4-466

తాళ్లపాక అన్నమాచార్య

రాగము: శుద్ధవసంతం

చేకొన్న భక్తుల పాలి చింతామణి సాకారమై వున్నాఁడు సర్వేశ్వరుఁడు	॥పల్లవి॥
వాఁడిగోళ్లచేత వడి హిరణ్యునిఁ జంపి వేడుక నెత్తురు లెల్ల వెదచల్లుచు పోఁడిమి నరసింహుఁడై పొడచూపె నల్లవాఁడె మూఁడు మూర్తులకును మూల మీతఁడు	॥చేకొన్న॥
కొండమీఁదఁ గూచుండి కోప ముపసంహరించి అండనున్నదేవతల కభయమిచ్చి మెండుగ సులభుఁడై మెరయుచు నున్నవాఁడు దండి జగముల కెల్ల దైవ మీతఁడు	॥చేకొన్న॥
వేవేలు చేతులను వెస నాయుధాలు వట్టి చేవ మీరి ప్రతాపాన సిరులు మించి యీవల నహోబలాన నిరవై యున్నవాఁడు శ్రీ వేంకటాద్రి మీఁది సిద్ధమూర్తి యీతఁడు	॥చేకొన్న॥