ఆంధ్రభారతి - తాళ్లపాక అన్నమాచార్య కీర్తనలు - ఏమని పొగడవచ్చు నీతని ప్రభావము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 383-1
సంపుటము: 4-482

తాళ్లపాక అన్నమాచార్య

రాగము: రామక్రియ

ఏమని పొగడవచ్చు నీతని ప్రభావము వేమరు నో పుణ్యులాల వినరో యీ కతలు	॥పల్లవి॥
అనంత సూర్య తేజుఁడట కాంతి చెప్ప నెంత దనుజాంతకుఁడట ప్రతాప మెంత మనసిజ గురుఁడట మరి చక్కఁదన మెంత వనజజుఁగనినట్టి వాఁడట ఘన తెంత	॥ఏమ॥
గంగా జనకుఁడట కడుఁ జెప్పే పుణ్య మెంత చెంగట భూ కాంతుఁడట సింగార మెంత రంగగు లక్ష్మీశుఁడట రాజసము లెంచ నెంత అంగవించు సర్వేశుఁడట సంప దెంత	॥ఏమ॥
మాయానాథుఁడట మహిమ వచించు టెంత యేయెడఁ దా విష్ణుఁడట యిర వెంత పాయక శ్రీ వేంకటాద్రిపతియై వరములచ్చే వేయి రూపులవాఁడట విస్తార మెంత	॥ఏమ॥