ఆంధ్రభారతి - తాళ్లపాక అన్నమాచార్య కీర్తనలు - ఇన్నిచేఁతలును దేవుఁడిచ్చినవే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 34-3
సంపుటము: 1-210

తాళ్లపాక అన్నమాచార్య

రాగము: శంకరాభరణం

ఇన్నిచేఁతలును దేవుఁడిచ్చినవే వున్నవారి యీవులెల్ల నొద్దికయ్యీనా	॥ఇన్ని॥
తెగని యాపదలకు దేవుఁడే కలఁడుగాక వగలుడుపఁ బరుల వస మయ్యీనా నొగిలి యితరలకు నోళ్ళు దెరచిన నగుఁబాటేకాక మానఁగఁ బొయ్యీనా	॥ఇన్ని॥
అగ్గలపు దురితాలు హరియే మానుపుఁ గాక బగ్గన నొక్కరు వచ్చి పాపఁ బొయ్యేరా తగ్గుముగ్గులైన వేళ తలఁచినవారెల్ల సిగ్గుఁబాటే కాక తమ్ముఁ జేరవచ్చేరా	॥ఇన్ని॥
యెట్టు సేసినను వేంకటేశుఁడే నేరుచుఁ గాక ^[1]కట్టఁగడవారెల్లఁ గరుణించేరా ^[2] యిట్టే యేమడిగిన నీతఁడే యొసఁగుఁ గాక వుట్టిపడి యెవ్వరైనా నూరడించేరా	॥ఇన్ని॥

^[1] కడ + కడ = ‘కట్టకడ’. ఇక్కడ అరసున్న విచార్యము.

^[2] నిడురేకు 88- గావఁబోయేరా.