ఆంధ్రభారతి - తాళ్లపాక అన్నమాచార్య కీర్తనలు - అవధారు చిత్తగించు హనుమంతుఁడు వీఁడె - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 384-4
సంపుటము: 4-490

తాళ్లపాక అన్నమాచార్య

రాగము: మాళవిగౌళ

అవధారు చిత్తగించు హనుమంతుఁడు వీఁడె భువిలోన గలశాపుర హనుమంతుఁడు	॥పల్లవి॥
రామ నీ సేవకుఁ డిదె రణరంగ ధీరుఁడు ఆముకొన్న సత్వగల హనుమంతుఁడు దీమసాన లంక సాధించి వుంగరము దెచ్చె కామిత ఫలదుఁడు యీ ఘన హనుమంతుఁడు	॥అవ॥
జానకీరమణ సప్తజలధులు లంఘించి ఆనుక సంజీవి దెచ్చె హనుమంతుఁడు పూని చుక్కలెల్లా మొలపూసలుఁగాఁగఁబెరిగి భాను కోటి కాంతితోఁ జొప్పడు హనుమంతుఁడు	॥అవ॥
యినవంశ శ్రీ వేంకటేశ నీ కరుణతోడ అనుపమ జయశాలి హనుమంతుఁడు పనిపూని ఇటమీఁది బ్రహ్మపట్టమునకు నీ - యనుమతిఁ గాచుకున్నా డదె హనుమంతుఁడు	॥అవ॥