ఆంధ్రభారతి - తాళ్లపాక అన్నమాచార్య కీర్తనలు - కొలువరో మొక్కరో కోరిన వరము లిచ్చీ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 385-1
సంపుటము: 4-492

తాళ్లపాక అన్నమాచార్య

రాగము: రామక్రియ

కొలువరో మొక్కరో కోరిన వరము లిచ్చీ సులభుఁ డిన్నిటా వీఁడె సుగ్రీవనరహరి	॥పల్లవి॥
కంబములోనఁ బుట్టి కనకదైత్యునిఁ గొట్టి అంబరపు దేవతల కభయ మిచ్చి పంబి సిరిఁ దన తొడపైఁ బెట్టుక మాటలాడీ అంబుజాక్షుఁ డైనట్టి యాదమ నరహరి	॥కొలు॥
నానా భూషణము లున్నతి తోడ నిడుకొని పూనికతో ప్రహ్లాదుని బుజ్జగించి మానవులకెల్లను మన్నన చాలా నొసఁగి ఆనందముతో నున్నాడుఁ అదిగో నరహరి	॥కొలు॥
మిక్కిలి ప్రతాపముతో మించిన కాంతులతోడ అక్కజపు మహిమల నలరుచును తక్కక శ్రీ వేంకటాద్రిఁ దావుకొని వరాలిచ్చీ చక్కఁదనముల కెల్లాఁజక్కని నరహరి	॥కొలు॥