ఆంధ్రభారతి - తాళ్లపాక అన్నమాచార్య కీర్తనలు - ఎక్కడఁ జొచ్చెదరింక రక్కసులు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 385-4
సంపుటము: 4-495

తాళ్లపాక అన్నమాచార్య

రాగము: నాట

ఎక్కడఁ జొచ్చెదరింక రక్కసులు చిక్కి చెడుఁడు నరసింహుని చేత	॥పల్లవి॥
వుడుగని కోపపుటుగ్రపుఁ జూపుల మిడుగురు లెగయఁగ మిన్నంది పిడుగుల మ్రోఁతలఁ బెళపెళ నార్చుచు వెడలెఁ గంభమున వీరసింహుఁడు	॥ఎక్కడ॥
కాలాగ్ని కీలలు గక్కెడి చక్రము కేలఁ బూని కుల గిరు లదర భాల లోచనము ప్రకటింపుచు లయ - కాలుఁడై వెలసెఁ గడిఁది సింహుఁడు	॥ఎక్కడ॥
కుటిల నఖంబుల ఘోరాకారత తొట తొట నెత్తురు దొరుగఁగను చటుల దానవులఁ జదుపుచు శ్రీవేం- కటమున నిలిచె సాకారసింహుఁడు	॥ఎక్కడ॥