ఆంధ్రభారతి - తాళ్లపాక అన్నమాచార్య కీర్తనలు - సేవించరో జనులాల చేతులెత్తి మొక్కరో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 386-3
సంపుటము: 4-500

తాళ్లపాక అన్నమాచార్య

రాగము: సాళంగనాట

సేవించరో జనులాల చేతులెత్తి మొక్కరో వావిరిఁ బ్రహ్లాదునికి వరదుఁడు వీఁడే	॥పల్లవి॥
జగన్నాథుఁడు వీఁడే సర్వరక్షకుఁడు వీఁడే నిగమవేద్యుఁడైన నిత్యుఁడు వీఁడే సగుణవంతుఁడు వీఁడే సర్వకాముఁడు వీఁడే నగు మొగము సుగ్రీవ నరసింహుఁడు వీఁడే	॥సేవిం॥
మరు జనకుఁడు వీఁడే మహిమాధికుఁడు వీఁడే పరగ శ్రీ లక్ష్మీపతి వీఁడే సురల కేలికె వీఁడే శుభ మూరితి వీఁడే నరసఖుఁడ సుగ్రీవ నరసింహుఁడు వీఁడే	॥సేవిం॥
భువనాధిపతి వీఁడే పురుషోత్తముఁడు వీఁడే వివిధ ప్రతాప కోవిదుఁడు వీఁడే ఇవల శ్రీ వేంకటాద్రి నిరవైనతఁడు వీఁడే నవమూర్తి సుగ్రీవ నరసింహుఁడు వీఁడే	॥సేవిం॥