ఆంధ్రభారతి - తాళ్లపాక అన్నమాచార్య కీర్తనలు - ఎంతని పొగడవచ్చు నీతని సేవించరో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 387-3
సంపుటము: 4-506

తాళ్లపాక అన్నమాచార్య

రాగము: మాళవిగౌళ

ఎంతని పొగడవచ్చు నీతని సేవించరో పొంత నిదే కలశాపుర హనుమంతుఁడు	॥పల్లవి॥
పిడికిటఁ బట్టినవి పెద్దపండుల గొలలు అడరి యెత్తినది మహావాలము గుడిగొన రాకాసులఁ గొట్టినది వలకేలు పొడచూపీఁ గలశాపుర హనుమంతుఁడు	॥ఎంత॥
సందడి సమరానకు చాఁచినది పెనుజంగ అందముగ నిక్కించినదదే వురము కుందక వీర రసమే కురిసేటిది మొగము పొందగువాఁడు కలశాపుర హనుమంతుఁడు	॥ఎంత॥
వుదుటన మెలఁగేవి వొద్దికైన పాదాలు త్రిదశుల మెప్పించేది దివ్యరూపము అదె శ్రీ వేంకటేశు బంటయి నిలుచున్నాఁడు వొదలుచుఁ గళశాపుర హనుమంతుఁడు	॥ఎంత॥