ఆంధ్రభారతి - తాళ్లపాక అన్నమాచార్య కీర్తనలు - సులభుఁడై వున్నాఁడు సుగ్రీవనారసింహుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 388-3
సంపుటము: 4-512

తాళ్లపాక అన్నమాచార్య

రాగము: బౌళి

సులభుఁడై వున్నాఁడు సుగ్రీవనారసింహుఁడు నెలకొన్న దాసులకు నిధానము వీఁడే	॥పల్లవి॥
తుంగభద్రా తటమున తొడపై నిందిర తోడ సింగారించుకొన్నవేల్పుసింహము వీఁడే సంగతిగా దేవతలు జయవెట్టి కొలువఁగా చెంగటనే మహిమలఁ జెలరేఁగీ వీఁడే	॥సుల॥
చలువ బండలమీఁద చక్కని కొండల దండ అలరీని వీరనరహరి వీఁడె వెలయు శంఖచక్రాల వేవేలు హస్తములతో బలవంతుఁడై వున్నాఁడు పంతముతో వీఁడే	॥సుల॥
పువ్వులతోఁటలనీడ భువనేశ్వరములోన జవ్వనపు మనుజ కేసరి వీఁడె ఇవ్వల శ్రీ వేంకటాద్రి నిరవై వరములిచ్చి నవ్వుమోముతోడ భువనము లేలీ వీఁడే	॥సుల॥