ఆంధ్రభారతి - తాళ్లపాక అన్నమాచార్య కీర్తనలు - ఇతఁడే పరబ్రహ్మ మిదియే రామకథ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 389-6
సంపుటము: 4-519

తాళ్లపాక అన్నమాచార్య

రాగము: బౌళిరామక్రియ

ఇతఁడే పరబ్రహ్మ మిదియే రామకథ శతకోటివిస్తరము సర్వపుణ్యఫలము	॥పల్లవి॥
ధరలో రాముఁడు పుట్టె ధరణిజఁ బెండ్లాడె అరణ్య వాసుల కెల్లా నభయమిచ్చె సొరిది ముక్కుఁ జెవులు చుప్పనాతిని గోసె ఖర దూషణులను ఖండించి వేసె	॥ఇతడే॥
కినసి వాలిఁ జంపి కిష్కింధ సుగ్రీవు కిచ్చె వనధి బంధించి దాఁటె వానరులతో కనలి రావణ కుంభ కర్ణాదులను జంపి వనితఁ జేకొని మళ్ళి వచ్చె నయోధ్యకును	॥ఇతడే॥
సౌమిత్రియు భరతుఁడు శత్రుఘ్నుఁడుఁ గొలువఁగ భూమి యేలె కుశలవ పుత్రలఁ గాంచె శ్రీ మంతుఁడై నిలిచె శ్రీ వేంకటాద్రిమీఁద కామించి విభీషణ లంకకుఁ బట్టము గట్టె	॥ఇతడే॥