ఎండగాని నీడగాని యేమైనఁగాని కొండలరాయఁడే మా కులదైవము[1]	॥ఎండ॥
తేలుగాని పాముగాని [2]దేవపట్టయినఁగాని గాలిగాని ధూళిగాని కాని యేమైనా కాలకూటవిషమైన గక్కున మింగిన నాటి నీలవర్ణుఁడే మా నిజదైవము	॥ఎండ॥
చీమగాని దోమగాని చెలఁది యేమైనఁగాని గాముగాని నాముగాని కాని యేమైనా పాములనిన్నిటి మింగే బలుతేజిపైనున్న ధూమకేతువే మాకు దొర దైవము	॥ఎండ॥
పిల్లిగాని నల్లిగాని పిన్న యెలుకైనఁగాని కల్లగాని పొల్లగాని కాని యేమైనా బల్లిదుఁడై వేంకటాద్రిపైనున్న యాతఁడే మ- మ్మెల్లకాలమును నేలేయింటి దైవము	॥ఎండ॥

---

^[1] నిడురేకు 115- గురుదైవము.

^[2] దేవపట్టు = యక్షరాక్షసాదులుండేటి స్థలము కావచ్చు. “విధ్యాధరోఽప్సరో యక్షరక్షో గంధర్వకింనరాః| పిశాచో గుహ్యక స్సిద్ధోభూతోఽమీ దేవయోనయః||” అమరము. ‘దేవపట్టు’వంటి సమాసములు ఈవాఙ్మయమున కలంకారములు.