ఆంధ్రభారతి - తాళ్లపాక అన్నమాచార్య కీర్తనలు - ఏమి సేయవచ్చుఁ గర్మమిచ్చినంత కాని లేదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
నిడు రేకు: 48-1
సంపుటము: 4-560

తాళ్లపాక అన్నమాచార్య

రాగము: సామంతం

ఏమి సేయవచ్చుఁ గర్మమిచ్చినంత కాని లేదు తాము సేసినంత వట్టు తమకుఁ బోరాదు	॥పల్లవి॥
ఇట్టు నట్టు మిట్టిపడ్డ నించుకంతా లేదు - వీఁపు పట్టగట్ట మోఁపు మోఁచి పాటువడ్డ లేదు తట్టువడ లోకమెల్ల దవ్వుకొన్న లేదు తెట్ట తెరువున నోరుదెరచిన లేదు	॥ఏమి॥
అడిగిపరుల బతుకాసపడ్డ లేదు - భీతి విడిచి నెత్తుటఁ దోఁగి వీరుఁడైన లేదు అడవులెల్లఁ దిరిగి అలమటించిన లేదు ఇడుమపాటుఁజొచ్చి యియ్యకొన్న లేదు	॥ఏమి॥
వచ్చి వచ్చి వనితల వలపించుకొన్న లేదు మెచ్చుల గుఱ్ఱమునెక్కి మేటియైన లేదు ఎచ్చరకఁ దిరువేంకటేశుఁ గొలువకుంటే ఇచ్చటచ్చట సుఖమించుకంత లేదు	॥ఏమి॥