ఆంధ్రభారతి - తాళ్లపాక అన్నమాచార్య కీర్తనలు - ఎక్కడ నున్నదో చిత్తమేమి దలఁచెనో యింతి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 5-3
సంపుటము: 5-28

తాళ్లపాక అన్నమాచార్య

రాగము: ముఖారి

ఎక్కడ నున్నదో చిత్తమేమి దలఁచెనో యింతి చెక్కులెల్లాఁ జెమరించీఁ జెప్పరమ్మా చెలులు	॥పల్లవి॥
ఆతని సుద్దులు చెప్పే అతివలే చుట్టాలు అతనిని వద్దనిన వారందరుఁ బగ రాతిరెల్లా నిద్దు రెరఁగదు పాదములొత్తి చేతులెల్లఁ బొక్కెనేమి సేతమమ్మా చెలులు	॥ఎక్కడ॥
నవ్వులు చెక్కులకు గన్నపుగండిదొంగలాయ నొవ్వులాయ జూపులు కన్నుల మీఁదికి దవ్వులాయఁ బయ్యద గందపు గుబ్బల మీఁదికి యెవ్వరి నొల్లదు యిఁకనేఁటికమ్మా చెలులు	॥ఎక్కడ॥
చిత్తమెల్లా దక్కఁగొనె సిగ్గులు ముంగిట వేసె వత్తివలె దేహమెల్లా వాడఁబారెను కత్తిఁ గోసినట్లు వేంకటపతి ఘాతలకు జొత్తు పాపవలె నాయఁ జూడరమ్మా చెలులు	॥ఎక్కడ॥