ఆంధ్రభారతి - తాళ్లపాక అన్నమాచార్య కీర్తనలు - విరహమొ సంభోగంబుల వేడుక శృంగారమొ యిది - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 14-1
సంపుటము: 5-79

తాళ్లపాక అన్నమాచార్య

రాగము: శ్రీరాగం

విరహమొ సంభోగంబుల వేడుక శృంగారమొ యిది సరసిజముఖిఁ గని ప్రాణము జల్లనఁ గలఁగెడినే	॥పల్లవి॥
కుటిలాలకి మైఁబూసిన కుంకుమగంధపు రసములు చిటిపొటి చెమటలఁ బెనఁగొని చిప్పిలి రాలఁగను విటరాయని యలరమ్ములు వీఁపున వెడలఁగ నాఁటిన తొట తొటఁ దొరిగిన నెత్తురుతోఁ దులదూఁగెడినే	॥విర॥
మృగలోచన చనుఁగవపై మెత్తిన కమ్మని తావుల మృగమదమంటినచోట్లు మెఱుఁగులు వారెడిని చిగురాకున మరుఁడేసిన చిచ్చిరబాణంబులచే ఎగసిన పొగలై తోఁచీ నేమని చెప్పుదునే	॥విర॥
యోగవియోగంబులచే నొనగూడిన యీ చెలియకు నాగరికంబుల చేఁతలు నటనలు మీరఁగను శ్రీగురుఁడై చెలువొందిన శ్రీవేంకటగిరి నిలయుని భోగించిన పరిణామపు పొందులు దెలిపెడినే	॥విర॥