ఆంధ్రభారతి - తాళ్లపాక అన్నమాచార్య కీర్తనలు - చెలియకు విరహపు వేదన సేయని సింగారంబిది - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 14-2
సంపుటము: 5-80

తాళ్లపాక అన్నమాచార్య

రాగము: నాదరామక్రియ

చెలియకు విరహపు వేదన సేయని సింగారంబిది సొలవక వలపుల ముద్రల చొప్పులు మాపకుఁడీ	॥పల్లవి॥
కిక్కిరిసిన చనుగుబ్బలు గీఁటిన బగిలెడి నయ్యో పక్కనఁ గనుకలి దాఁకీ బయ్యెద దెరవకుఁడీ వెక్కసమగు ముఖకాంతికి వెడవెడ మరుఁగై తోఁచెడి చెక్కుల చెమటలు గందెడి చేతులు వెట్టకుఁడీ	॥చెలియ॥
అంగన మేనికిఁ బులకలు అడ్డము దోఁచెడి నయ్యో బంగరు మొలకలవంటివి పైపైఁ దుడువకుఁడీ తొంగలి రెప్పల కెలఁకుల తొరిగెడి కన్నుల మెరుఁగుల ముంగిటవేసిన చూపుల మురిపెము మానుపుఁడీ	॥చెలియ॥
తిరువేంకటపతినింతికి దెచ్చెదమనఁగా నయ్యో కరుణించినవాఁడాతఁడె కళవళమందకుఁడీ తరుణీమణి మా దేవునిఁ దగఁ గౌఁగిట సౌఖ్యంబులు పరవశమందినదేమో పలుమరుఁ బిలువకుఁడీ	॥చెలియ॥