ఆంధ్రభారతి - తాళ్లపాక అన్నమాచార్య కీర్తనలు - కుందణంపు మై గొల్లెత తా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 16-3
సంపుటము: 5-92

తాళ్లపాక అన్నమాచార్య

రాగము: ఆహిరి

కుందణంపు మై గొల్లెత తా- నెందును బుట్టని యేతరి జాతి	॥పల్లవి॥
కప్పులు దేరేటి కస్తూరి చంకల కొప్పెర గుబ్బల గొల్లెత చప్పుడు మట్టెల చల్లలమ్మెడిని అప్పని ముందట హస్తిణిజాతి	॥కుంద॥
దుంప వెంట్రుకల దొడ్డతురుముగల - గుంపెన నడపుల గొల్లెత జంపుల నటనలఁ జల్లలమ్మెడిని చెంపల చెమటల చిత్తిణిజాతి	॥కుంద॥
వీఁపున నఖములు వెడవెడ నాఁటిన కోపపుఁ జూపుల గొల్లెత చాఁపున కట్టిగఁ జల్లలమ్మెడిని చాఁపేటి యెలుగున శంకిణిజాతి	॥కుంద॥
గారవమున వేంకటపతి కౌఁగిట కూరిమిఁ బాయని గొల్లెత సారెకు నతనితో చల్లలమ్మెడిని బారపుటలపుల పద్మిణిజాతి	॥కుంద॥