ఆంధ్రభారతి - తాళ్లపాక అన్నమాచార్య కీర్తనలు - చెంగటనె చెలువంపుఁ జీఁకటి దవ్వఁగను - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 21-5
సంపుటము: 5-118

తాళ్లపాక అన్నమాచార్య

రాగము: ఆహిరి

చెంగటనె చెలువంపుఁ జీఁకటి దవ్వఁగను ముంగిట నిధానమబ్బె మొక్కుదుఁ గాకిఁకను	॥పల్లవి॥
కొండుకవయసు కొమ్మగుబ్బలపై బ్రేమపు- టెండదాఁకి పులకలనెన్ను వెళ్ళఁగా బెండుపడి కైవాలెఁ బెనుదురుమిఁకనేమి పండెఁ గోసుకొందుగాక పనులేఁటికిఁకను	॥చెంగ॥
చక్కని జవ్వని కన్నుఁజాయల పాదరసము పుక్కిటి వెచ్చని పూరుపుల నూదఁగా గక్కన బంగారాయ కడలేని కోరికలు దక్కెఁ దీసుకొందుగాక తడవేల యిఁకను	॥చెంగ॥
పల్లదపుఁ జెమటల పాల జలనిధి దచ్చి వెల్లిగొన సిరులెల్ల వేంకటేశుఁడా పల్లవాధరిచనపు పచ్చిదేర వేడుకెల్ల కొల్ల చేకొందువుగాక కొంకనేఁటికిఁకను	॥చెంగ॥