ఆంధ్రభారతి - తాళ్లపాక అన్నమాచార్య కీర్తనలు - కొనచూపులనె వింతకోరికలు దైవార - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 24-2
సంపుటము: 5-133

తాళ్లపాక అన్నమాచార్య

రాగము: సామంతం

కొనచూపులనె వింతకోరికలు దైవార పెనగొన్న తమకములఁ బెనఁగు టెన్నఁడురా	॥పల్లవి॥
కమ్మ కస్తూరితావి కప్పురపువాసనల- తమ్ములము నోరిలోఁ దగఁ గులికి కులికి ఉమ్మగింతల రతులనుడివోని వేడుకల ఇమ్ములను గడి సుఖియించు టెన్నఁడురా	॥కొన॥
బిగువుఁ గౌఁగిటఁ జేర్చి బిత్తరపుఁ జూపులను నగవు దేరఁగ మనసు నాఁటించి మించి మొగము మొగమునఁజేర్చి ముద్దుమాటలను నునుఁ- బగడవాతెర గదలఁ బలుకు టెన్నఁడురా	॥కొన॥
కడు మోహమున సిగ్గు గదియు టెన్నఁడు లేక యెడలేని కూటముల యెచ్చరిక లేక విడువకిటువలెనె తిరువేంకటేశుఁడ నీవు వడిఁదలఁచి నాకడకు వచ్చుటెన్నఁడురా	॥కొన॥