ఆంధ్రభారతి - తాళ్లపాక అన్నమాచార్య కీర్తనలు - మారుకు మారు సేయ మఱచి నీ వంతలోనె - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 30-5
సంపుటము: 5-171

తాళ్లపాక అన్నమాచార్య

రాగము: పాడి

మారుకు మారు సేయ మఱచి నీ వంతలోనె నేరములెంచుకొనేవు నేఁటిలోనే తప్పెనా	॥పల్లవి॥
చొక్కపు నీ గుబ్బలపై జూజపు నేఁతలవలె చిక్కులు జీరలువారఁ జించెనాతఁడు తెక్కుల నీ వూరకుండి తెలిగన్నుల నీళ్ళు గుక్కేవు నీ చేతులేమి కూరగోయఁ బోయెనా	॥వరు॥
ముసిముసి నగవుల మోవిమీఁది కెంపులవి కసిగాటు సేఁతలనే కప్పె నతఁడు అసురుసురై నీవు అతనిఁజేయఁగలేక వుసురనేవప్పుడేమి వూరలేక వుంటివా	॥వరు॥
కూరిమి నీ కౌఁగిటిలోఁ గూడి నీ చిత్తమనెడి వూరిలోనఁ గాఁపురమైవుండె నాతఁడు వేరులేని మహిమల వెంకటేశుఁడతనిమై చూరగొంటి వప్పుడేమి జోడువెట్టుకుండెనా	॥వరు॥