ఆంధ్రభారతి - తాళ్లపాక అన్నమాచార్య కీర్తనలు - ఎటువంటి భోగి వీఁడెటువంటి జాణ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 61-3
సంపుటము: 5-177

తాళ్లపాక అన్నమాచార్య

రాగము: సామంతం

ఎటువంటి భోగి వీఁడెటువంటి జాణ వటపత్రమున నున్నవాఁడా వీఁడు	॥పల్లవి॥
పొదిగొనఁ బూచిన పున్నాగతరులలో పొదలుఁ బుప్పొళ్ళపైఁ బూఁదేనె సోనలు గదలుచు జడివానకాలంపుఁ బెదపెద్ద- నదులై పారనున్నతిని కదలని నడిగడ్డ కల్పభూజంబుల పదిలమైన నీడ బంగారు చవికెలో కదిసిన జలరాశి కన్నెకౌఁగిటఁ గూడి వదలకెప్పుడు నున్నవాఁడా వీఁడు	॥ఎటు॥
వలనగు తావుల వాంతికలలోన కెలఁకుల నరవెడ్పుఁ గెందామరలయందు పొలయుచు గొజ్జంగపూవుల దూళితో లలితంపు గాలి చల్లఁగను కొలందిమీరిన మంచి కోనేటి పన్నీటి- జలములలో నున్న జలముఖులుఁ దాను అలరుచుఁ దననోలలాడుచు నేప్రొద్దు వలపులు చల్లినవాఁడా వీఁడు	॥ఎటు॥
లోకము లోపలి లోలలోచనలెల్లా జోకైన తనవాలుఁ జూపులచేఁ జిక్కి యీకడాకడ చూడనెఱఁగక నిజమైన- సాకారమునకె మెచ్చఁగను పైకొన్న సరసపుఁ బలుకులఁ గరఁగించి యేంకాతమున సౌఖ్యమెల్లఁ జేకొనుచుఁ దా- నీకడఁ దిరువేంకటేశుఁ డై యున్నాఁడు వైకుంఠపతియైన వాఁడా వీఁడు	॥ఎటు॥