ఆంధ్రభారతి - తాళ్లపాక అన్నమాచార్య కీర్తనలు - పిడికిటి తలఁబాల పెండ్లికూఁతురు కొంత - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 62-5
సంపుటము: 5-185

తాళ్లపాక అన్నమాచార్య

రాగము: శ్రీరాగం

పిడికిటి తలఁబాల పెండ్లికూఁతురు కొంత పెడమరలి నవ్వీనె పెండ్లికూఁతురు	॥పల్లవి॥
పేరుకల జవరాలె పెండ్లికూఁతురు పెద్ద- పేరులముత్యాలమేడ పెండ్లికూఁతురు పేరంటాండ్ల నడిమి పెండ్లికూఁతురు విభుఁ బేరు కుచ్చ సిగ్గువడీఁ బెండ్లికూఁతురు	॥పిడి॥
బిరుదు పెండెము వెట్టెఁ బెండ్లికూఁతురు నెర- బిరుదు మగనికంటెఁ బెండ్లికూఁతురు పిరిదూ రినప్పుడె పెండ్లికూఁతురు పతిఁ బెరరేఁచీ నిదివో పెండ్లికూఁతురు	॥పిడి॥
పెట్టెనె పెద్దతురుము పెండ్లికూఁతురు నేఁడె పెట్టెఁడు చీరలుగట్టెఁ బెండ్లికూఁతురు గట్టిగ వేంకటపతికౌఁగిటను వడి- పెట్టిన నిధానమైన పెండ్లికూఁతురు	॥పిడి॥