ఆంధ్రభారతి - తాళ్లపాక అన్నమాచార్య కీర్తనలు - బయ లీఁదించేవే గొల్లపడుచా - నీవె - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 64-5
సంపుటము: 5-197

తాళ్లపాక అన్నమాచార్య

రాగము: ఆహిరి

బయ లీఁదించేవే గొల్లపడుచా - నీవె బయ లీఁదించేవు లోపలనె కన్నులను	॥పల్లవి॥
పాలు వోయవుగా గొల్లపడుచా-యీ- పాలుకుండలివి లోలోపల నున్నవి పాలుమాలేవేలే గొల్ల పడుచా- మా- పాలు నీ కేలయ్య పాలవారివాఁడవు	॥బయ॥
పచ్చితేనె దేవే గొల్లపడుచ- మాకు పచ్చితేనె లేదు మావిపంటనే కాని పచ్చిమాటలేలే గొల్లపడుచ- పూవుఁ- బచ్చితేనెలివివో నీ పలుకుల కొనలు	॥బయ॥
పసిచల్లమ్మే గొల్లపడుచా- నీవె పసివడి తిరిగేవు బడివాయక పసిబాలవటె గొల్లపడుచా- కురుఁ- బల వేంకటగిరిపతి నన్నేలితివి	॥బయ॥