ఆంధ్రభారతి - తాళ్లపాక అన్నమాచార్య కీర్తనలు - సొగియునా మఱియు ముచ్చుకుఁ బండువెన్నెలలు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 39-6
సంపుటము: 1-242

తాళ్లపాక అన్నమాచార్య

రాగము: బౌళి, జంపెతాళం

సొగియునా మఱియు ముచ్చుకుఁ బండువెన్నెలలు పగవానివలెనె లోపల దాఁగుఁ గాక	॥సొగియు॥
దక్కునా పేదకును తరముగాని ధనంబు చిక్కి యెవ్వరికై నఁ జేరుఁ గాక వెక్కసంబైన గోవిందునిఁ దలఁపు బుద్ధి తక్కిన పరులకెల్లఁ దలఁపేల కలుగు	॥సొగియు॥
అరగునా దుర్బలున కరుదైన యన్నంబు ^[1]కురుచబుద్ధులను నరమిగొనుఁ గాక తొరలునా హరివినుతి దుష్టునకు నది నోరఁ దొరలెనా యతనినే దూషించుఁ గాక	॥సొగియు॥
చెల్లునా యమృతంబు సేవించ నధమునకు వొల్లనని నేలపై నొలుకుఁ గాక వెల్లిగొను మందునకు వేంకటేశు స్మరణ చల్లనౌనా మనసు శఠియించుఁ గాక	॥సొగియు॥

^[1] ‘కరుచ బుద్ధులను’ పూ.ము.పా. యతిభంగము కాబోలు.