ఆంధ్రభారతి - తాళ్లపాక అన్నమాచార్య కీర్తనలు - కలిసి కాఁకలఁ బెట్ట కనుసన్నలనె తిట్ట - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 65-4
సంపుటము: 5-202

తాళ్లపాక అన్నమాచార్య

రాగము: ముఖారి, ఏకతాళి

కలిసి కాఁకలఁ బెట్ట కనుసన్నలనె తిట్ట చలపట్ట నీకుఁ జెల్లే జాణఁడే యతఁడు	॥పల్లవి॥
పగటుగుబ్బలురాయ పసిఁడి మట్టెలు మ్రోయ నగవువెన్నెల గాయ నడచేవు వగ నిన్ను భ్రమయించ వలపువారిధి ముంచ జగడాలు వచరించ చతురుఁడే యతఁడు	॥కలసి॥
చూపులనె పగచాట సొబగులఁ గనుగీఁ టఁ దీపు పైపైమీఁటఁ దిరిగేవు కోపగింతలనేఁప కూరిములు పైఁజాఁప రావులు పెరరేఁప రసికుఁడే యతఁడు	॥కలసి॥
సందుల దండలు జార జవ్వాదిచెమట గార నందములు దైవార నలసేవు కందువుల నినుఁగూడి కరఁగి సిగ్గులు వీడి విందై నీతోడుతనాడే వేంకటేశుఁడితఁడు	॥కలసి॥