ఆంధ్రభారతి - తాళ్లపాక అన్నమాచార్య కీర్తనలు - నీవు దురగముమీఁద నేర్పు మెరయ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 66-6
సంపుటము: 5-210

తాళ్లపాక అన్నమాచార్య

రాగము: సాళంగం

నీవు దురగముమీఁద నేర్పు మెరయ వేవేలు రూపములు వెదచల్లితపుడు	॥పల్లవి॥
పదిలముగ నిరువంక పసిఁడిపింజల యంప- పొదుల తరకసములొరపులు నెరపఁగ గదయు శంఖంబుఁ జక్రము ధను:ఖడ్గములు పదివేలు సూర్యబింబములైనవపుడు	॥నీవు॥
సొరిది శేషుని పెద్దచుట్టు పెనుఁ గేవడము సిరిదొలఁక నొకచేతఁ జిత్తగించి దురమునకుఁ దొడవైన ధూమకేతువు చేత- నిరవైన బల్లెమై యేచెనందపుడు	॥నీవు॥
కరకజడతో రమాకాంత జయలక్ష్మీయై తొరలి కౌఁగిట నిన్నుఁ దొడికి పట్టి చరచె వెను వేంకటస్వామి నిను గెలువుమని మెరుఁగు కుచకుంభముల మిసిమితో నపుడు	॥నీవు॥