ఆంధ్రభారతి - తాళ్లపాక అన్నమాచార్య కీర్తనలు - కామయాగము చేసెఁ గలికి తన - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 69-1
సంపుటము: 5-223

తాళ్లపాక అన్నమాచార్య

రాగము: కన్నడగౌళ

కామయాగము చేసెఁ గలికి తన- ప్రేమమే దేవతాప్రీతిగాను	॥పల్లవి॥
పొలుపలర సురతతాంబులరసపానంబు నలినాక్షి సోమపానంబు గాను కలకలంబుల మంచి గళరవంబుల మోఁత తలకొన్న వేదమంత్రములుగాను	॥కామ॥
పడఁతి తన విరతాపమునఁ బుట్టిన యగ్ని అడరి దరికొన్న హోమాగ్నిగాను ఒడఁబడిక సమరతుల నుదయించిన చెమటఁ దడియుటే యది యవభృథంబుగాను	॥కామ॥
తనరఁ గుచముల రుచులు దంతాక్షత క్రీడ ననుపైన పశుబంధనంబుగాను యెనసి శ్రీతిరువేంకటేశ్వరుని పొందు ఘనమైన దివ్యభోగంబుగాను	॥కామ॥