ఆంధ్రభారతి - తాళ్లపాక అన్నమాచార్య కీర్తనలు - మోవిపై వీడెపు కెంపు ముచ్చటాడఁగ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 87-3
సంపుటము: 5-334

తాళ్లపాక అన్నమాచార్య

రాగము: ఆహిరి

మోవిపై వీడెపు కెంపు ముచ్చటాడఁగ చేవవచ్చి చిగురు పైఁ జిమ్మి రేఁగీనే	॥పల్లవి॥
వానగుబ్బలమీఁద వల్లెవాటుగా జార- వేసిన వయ్యెదకొంగు వెంటఁ దూలఁగ తీసిన ఘాతల ముద్దుఁదీగె చందురులమీఁదఁ గానేటి వెన్నెలవలెఁ గానవచ్చీనే	॥మోవి॥
వేఁకపు నెరులకొప్పు వెక్కసపు విరులతో తేఁకువమీరఁగఁ గడు దీపించఁగా చీఁకటిలోపల మించు చిన్నిచిన్ని వెన్నెలలు తోఁకచుక్కలై చూడఁ దొంగలించీనే	॥మోవి॥
పాదముల దాటించు పసిఁడి మట్టెల మోఁత మోదపు కంకణరవముల మీరఁగా గాదిలి నీ కౌఁగిటి వేంకటపతిమీఁదిపాట వేదముల మీరినట్లు వెదచల్లీనే	॥మోవి॥