ఆంధ్రభారతి - తాళ్లపాక అన్నమాచార్య కీర్తనలు - చాలు నింక నిటువంటి సంసారము మరుని - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 43-4
సంపుటము: 6-10

తాళ్లపాక అన్నమాచార్య

రాగము: శ్రీరాగం

చాలు నింక నిటువంటి సంసారము మరుని పాలైతి నిపు డింటి భాగ్యమిది నాకు	॥పల్లవి॥
తనియు కిటు నీవు గాంతల నెల్లనా యెదుట గొనియాడ దొరకొంటి కొంకులేక వినియుఁ బ్రాణము తోడ విషమైన యీకూడు దినఁజేరినది యేఁటి దేహ మిది నాకు	॥చాలు॥
వెఱవ కిటు సతుల నీ వెను వెంటఁ బెట్టుకొని మెఱయ దొరకొంటివిదె మేరలేక యెఱిఁగియునుఁ దీపనుచు నిట్టి నీ మన్ననల చెఱఁబెట్టినది యేఁటి జీవమిది నాకు	॥చాలు॥
ఎక్కువగు నీతరుణు లిందరిని నాకిట్ల మ్రొక్కించ దొరకొంటి మొఱఁగు లేక గ్రక్కునను నన్ను వేంకటగిరీశ్వర కలసి చిక్కనైతివి చాలుఁ జిన్నమిది నాకు	॥చాలు॥