[1]చెలి నేఁడు తానేమి సేయునమ్మ చెలి యేమి సేయు నీ చెలులేమి సేయుదురు చెలువైన విభు మేని చెలువింత సేయఁగా	॥చెలి॥
సతి నేఁడు బంగారుచవికెలోఁ జిత్రంపు- గతు లెంత చూపినఁ గడకంటఁ జూడదు అతనిఁ జూచిన మంచియబ్బురపుఁ జూపులు అతని వెంటనే పోయ నటు గాఁబోలును	॥చెలి॥
తేనియలూరేటి మంచి తియ్యనిమాటలు మంత్ర- గానములుగా వినుపించి కడు వేసరితిమి వాని మాటలు విన్న వలనైన ముదమున వీనులు ముద్రించిన విధము గాఁబోలును	॥చెలి॥
నిచ్చళపు మోమున నెయ్యము దైలువారె బచ్చనచేఁతలు గుబ్బలపై నిండనొప్పెను అచ్చపువేడుక వేంకటాద్రీశుఁ డీరేయి నెచ్చెలికి నిచ్చినట్టి నేరుపు గాఁబోలును	॥చెలి॥

---

^[1] 359, 360 పాటలు రెండూ పూర్వముద్రణమున తప్పిపోయినవి. 359వ పాట శుద్ధశృంగారసంకీర్తనములలో నుండదగినది. 360వ పాట వేదాంతవిషయోపమానములతో కూడిన శృంగారసంకీర్తనము.