ఆంధ్రభారతి - తాళ్లపాక అన్నమాచార్య కీర్తనలు - వైష్ణవులుగానివార లెవ్వరు లేరు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 6-1
సంపుటము: 1-36

తాళ్లపాక అన్నమాచార్య

రాగము: ధన్నాసి

వైష్ణవులుగానివార లెవ్వరు లేరు విష్ణుప్రభావ మీవిశ్వమంతయుఁ గాన	॥వైష్ణవులు॥
అంతయు విష్ణు ^[1]మయం బట మరి దేవ- తాంతరములు గలవననేలా భ్రాంతిఁ బొంది ^[2]యీ భావము భావించి- నంతనే పుణ్యులవుట దప్పదుగాన	॥వైష్ణవులు॥
యెవ్వరిఁ గొలిచిన నేమిగొరఁత మరి యెవ్వరిఁ దలచిన నేమి అవ్వలివ్వల శ్రీహరిరూపుగానివా- రెవ్వరు లేరని యెరుకదోచినఁ జాలు	॥వైష్ణవులు॥
అతిచంచలంబైన యాతుమ గలిగించు కతమున బహుచిత్తగతులై యితరులఁ గొలిచిన యెడయక యనాథ- పతి తిరువేంకటపతి చేకొనుఁ గాక	॥వైష్ణవులు॥

^[1] ‘మయఁబట’ అని రేకు.

^[2] ‘యేభావ’ పూ.ము.పా., రేకు.