ఆంధ్రభారతి - తాళ్లపాక అన్నమాచార్య కీర్తనలు - భోగీంద్రులును మీరుఁ బోయి రండు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 70-5
సంపుటము: 1-368

తాళ్లపాక అన్నమాచార్య

రాగము: ముఖారి

భోగీంద్రులును మీరుఁ బోయి రండు వేగన మీఁదటి విభవాలకు	॥భోగీంద్రు॥
హరుఁడ పోయిరా; అజుఁడ నీవును బోయి తిరిగిరా మీఁదటి తిరుణాళ్ళకు; సురలు మునులును భూసురలుఁ బోయి రండు అరవిరి నిన్నాళ్ళు నలసితిరి	॥భోగీంద్రు॥
జముఁడ పోయిరా; శశియు ^[1] నీవును బోయి సుముఖుఁడవై రా సురలఁ గూడి; గుములై దిక్పతులు దిక్కులకుఁ బోయి రండు ప్రమదాన నిన్నాళ్ళు బడలితిరి	॥భోగీంద్రు॥
నారద సనకసనందనాదులు భూరి విభవములఁ బోయిరండు; దూరముగాఁ బోకిట్టే ^[2] తొరలి వేంకటగిరిఁ జేరి నన్నిట్లనే సేవించుఁడీ	॥భోగీంద్రు॥

^[1] (నిడురేకు 58) శని.

^[2] (నిడురేకు 58) దూరంగాకిట్టే.