మేదిని జీవులఁ గావ మేలుకోవయ్యా నీ దయే మాకెల్ల రక్ష నిద్ర మేలుకోవయ్యా	॥మేదిని॥
తగు గోపికల కన్నుఁ దామరలు [1]వికసించె మిగుల సూర్యనేత్రుఁడ మేలుకోవయ్యా తెగువ రాక్షసులనే తిమిరము విరియఁగ నెగడిన పరంజ్యోతి నిద్ర మేలుకోవయ్యా	॥మేదిని॥
ఘనదురితపు నల్లఁగలువలు వికసించె మినుకు[2] శశివర్ణుఁడ మేలుకోవయ్యా పనివడి వేదాలనే పక్షులెల్లాఁ బలుకఁగ [3]జనక(?) యాశ్రితపారిజాత మేలుకోవయ్య	॥మేదిని॥
వరలక్ష్మీకుచచక్రవాకము లొండొంటి రాయ మెరయు దోషరహిత మేలుకోవయ్యా పొరసి నీవు నిత్యభోగములు భోగించ నిరతి శ్రీవేంకటేశ నేఁడు మేలుకోవయ్యా	॥మేదిని॥

---

^[1] ‘వికసించ’ కావచ్చు.

^[2] ‘శశినేత్రుఁడ’ కావచ్చు.

^[3] ‘తండ్రీ’ అనునర్థములో జనకశబ్దము కావచ్చు. పూ.ము.పాఠములో ప్రశ్నార్థకచిహ్నమెట్లో?