ఆంధ్రభారతి - తాళ్లపాక అన్నమాచార్య కీర్తనలు - ఆతుమ సంతసపెట్టు టది యెఱుక, తా- - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 79-3
సంపుటము: 1-378

తాళ్లపాక అన్నమాచార్య

రాగము: లలిత

ఆతుమ సంతసపెట్టు టది యెఱుక, తా- నేతెరువు నొల్లకుండు టిదియే యెఱుక	॥ఆతుమ॥
ముంచిన బంధములలో ముణుఁగుడు వడక తా- నంచల విడఁదన్ను టది యెఱుక చంచలపు విషయాల సగ్గుడుముగ్గుడు గాక యెంచిఁ హరిఁ దలపోయు టిదియే యెఱుక	॥ఆతుమ॥
పాయని యర్థములకు బంటుబంటై తిరుగక ఆయతమై మోసపోని దది యెఱుక పాయపుఁ గామినులతోఁ బలుమారుఁ జేయు పొందు హేయమని తలపోయు టిదియే యెఱుక	॥ఆతుమ॥
ధరమీఁదఁ గల ప్రాణితతుల నొప్పించక అరయఁగ సముఁడగు టది యెఱుక గరిమల శ్రీవేంకటపతిదాసుఁడై యిరవొంద సుఖించు టిదియే యెఱుక	॥ఆతుమ॥