ఆంధ్రభారతి - తాళ్లపాక అన్నమాచార్య కీర్తనలు - అంతర్యామీ అలసితి సొలసితి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 79-6
సంపుటము: 1-381

తాళ్లపాక అన్నమాచార్య

రాగము: లలిత

అంతర్యామీ అలసితి సొలసితి యింతట నీ శరణిదె చొచ్చితిని	॥అంతర్యామీ॥
కోరిన కోర్కులు కోయని కట్లు తీరవు నీవవి తెంచక భారపుఁ బగ్గాలు పాపపుణ్యములు నేరుపులఁ బోనీవు నీవు వద్దనక	॥అంతర్యామీ॥
జనుల సంగములఁ జక్కరోగములు విను విడువవు నీవు విడిపించక వినయపు దైన్యము విడువని కర్మము చన దది నీవిటు ^[1]సంతపరచక	॥అంతర్యామీ॥
మదిలో చింతలు మయిలలు మణుఁగులు వదలవు నీవవి వద్దనక యెదుటనెఁ శ్రీవేంకటేశ్వర నీవదె అదనఁ గాచితివి అట్టిట్టనక	॥అంతర్యామీ॥

^[1] ‘సంతపరచు’ = శాంతపరచు అని అర్థము కావచ్చు.