ఆంధ్రభారతి - తాళ్లపాక అన్నమాచార్య కీర్తనలు - వెనకేదో ముందరేదో వెఱ్ఱి నేను నా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 103-4
సంపుటము: 2-16

తాళ్లపాక అన్నమాచార్య

రాగము: ముఖారి

వెనకేదో ముందరేదో వెఱ్ఱి నేను నా- మనసు మరులు దేర మందేదొకో	॥పల్లవి॥
చేరి మీఁదటిజన్మము సిరులకు నోమేఁ గాని యే రూపై పుట్టుదునో యెఱఁగ నేను కోరి నిద్రించఁ బరచుకొన నుద్యోగింతుఁ గాని సారె లేతునో లేవనో జాడ దెలియ నేను	॥వెన॥
తెల్లవారినప్పుడెల్లా తెలిసితిననేఁ గాని కల్లయేదో నిజమేదో కాన నేను వల్ల చూచి కామినుల వలపించేఁ గాని మొల్లమై నామేను ముదిసిన దెరఁగ	॥వెన॥
పాపాలు చేసి మఱచి బ్రదుకుచున్నాఁడఁ గాని వైపుగఁ జిత్రగుప్తుడు వ్రాయు టెఱఁగ యేపున శ్రీవేంకటేశు నెక్కడో వెతకేఁ గాని నాపాలిదైవమని నన్నుఁ గాచు టెఱఁగ	॥వెన॥