ఆంధ్రభారతి - తాళ్లపాక అన్నమాచార్య కీర్తనలు - ఈ విశ్వాసంబు యెవ్వరికిఁ దోఁప దిది - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 10-4
సంపుటము: 1-64

తాళ్లపాక అన్నమాచార్య

రాగము: శ్రీరాగం

ఈ విశ్వాసంబు యెవ్వరికిఁ దోఁప దిది పావనుల హృదయమునఁ బ్రభవించుఁ గాని	॥ఈ విశ్వాస॥
ఇమ్మయిన పాపంబు లెన్నివలసినఁ బ్రాణి సమ్మతంబున జేయఁజాలుఁ గాకేమి కుమ్మరికి నొకయేఁడు గుదియ కొకనాఁడవును నమ్మి తలఁచిన విష్ణునామంబుచేత	॥ఈ విశ్వాస॥
కొదలేని దురితములు ^[1]కొండలునుఁ గోట్లును చెదర కెప్పుడుఁ బ్రాణి చేయుఁ గాకేమి పొదరి గొరియలలోన పులిచొచ్చినట్లౌను హృదయంబు హరిమీఁద నుండినంతటను	॥ఈ విశ్వాస॥
సరిలేని దుష్కర్మసంఘములు రాసులై పెరుగఁ జేయుచు ప్రాణి పెంచుఁ గాకేమి బెరసి కొండలమీఁదఁ బిడుగువడ్డట్లౌను తిరువేంకటాచలాధిపునిఁ దలఁచినను	॥ఈ విశ్వాస॥

^[1] ‘కొండలుఁగోట్లును’ అని పూ.ము.పా.