ఘోరవిదారణ నారసింహ నీ- వీ రూపముతో నెట్లుండితివో	॥ఘోర॥
ఉడికెడి కోపపుటూర్పులఁ గొండలు పొడివొడియై నభమున కెగయ బెడిదపు రవమున పిడుగులు దొరుగఁగ యెడనెడ నీవపు డెట్లుండితివో	॥ఘోర॥
కాలానలములు గక్కుచు నయన- జ్వాలల నిప్పులు చల్లుచును భాలాక్షముతో బ్రహ్మాండకోట్ల- కేలికవై నీవెట్లుం[1]డితివో	॥ఘోర॥
గుటగుటరవములు కుత్తికఁ గులుకుచు గిటగిటఁ బండ్లు గీఁటుచును తటతటఁ బెదవులు దవడలు వణఁకఁగ ఇటువలె నీవపుడెట్లుండితివో	॥ఘోర॥
గోళ్ళ మెఱుఁగుల కొంకుల పెదపెద- వేళ్ళ దిక్కులు వెదకుచును నీళ్ళతీగెలు [2]నిగుడఁగ [3]నోర ను- చ్చిళ్ళు [4]గమ్మఁగ నెట్లుండితివో	॥ఘోర॥
హిరణ్యకశిపుని నేపడఁచి భయం- కరరూపముతోఁ గడుమెరసి తిరువేంకటగిరిదేవుఁడ [5]నీవిఁక యిరవుకొన్న నాఁడెట్లుండితివో	॥ఘోర॥

---

^[1] నిడురేకు 11లోని పాఠము- నాఁడెట్లుండి.

^[2] నిడురేకు 11లోని పాఠము- నిగిడి.

^[3] నిడురేకు 11లోని పాఠము- నోర.

^[4] నిడురేకు 11లోని పాఠము- గారఁగ.

^[5] నిడురేకు 11లోని పాఠము- డవై యిందిరవుకొంటి.