ఏఁటివిజ్ఞాన[1] మేఁటిచదువు గూఁటఁబడి వెడలుగతి గురుతు గనలేఁడు	॥ఏఁటి॥
ఏడుమడుకల చర్మ మింతయునుఁ దూంట్లై[2] గాడఁబెట్టుచుఁ జీము గారఁగాను పాడైన యిందులో బ్రదుకుగోరీఁ బ్రాణి[3] వీడఁదన్నుక చనెడి వెరవు గనలేఁడు	॥ఏఁటి॥
కడుపు నిండిన మహాకష్టంబు నలుగడల వెడలుచును బెనుమురుకి వేయఁగాను యిడుమఁ బొందుచు [4]సుఖంబిందుకే వెదకీని వొడలు మోవఁగ జీవుఁ డోపననలేఁడు	॥ఏఁటి॥
వుదకమయమగు కన్ను లురికి యేమైనఁ గని మదవికారము మతికి మరుపఁగాను యిది యెరిఁగి తిరువేంకటేశుఁ గని జీవుఁడా- సదమలానందంబు చవి గానలేఁడు	॥ఏఁటి॥

---

^[1] నిడురేకు 4- సుజ్ఞాన.

^[2] నిడురేకు 4- దూంట్లను.

^[3] నిడురేకు 4- దేహంబు బ్రదుకఁ గోరీఁ గాని.

^[4] ‘సుఖము యిందు’ అని రేకు.