ఆంధ్రభారతి - తాళ్లపాక అన్నమాచార్య కీర్తనలు - చెప్పితేఁ బాసునందురు చేసిన దోసములెల్లా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 165-1
సంపుటము: 2-312

తాళ్లపాక అన్నమాచార్య

రాగము: శ్రీరాగం

చెప్పితేఁ బాసునందురు చేసిన దోసములెల్లా వొప్పుగొని మన్నించ నుచితమౌ నీకు	॥పల్లవి॥
క్షమియించుకొనవే సర్వాపరాధములు క్రమ మెఱఁగ కేమేమి గావించితినో రమణతో సర్వలోకరక్షకుఁడవట నీవు తమితోడ నన్నుఁ గావఁ దగవౌను నీకు	॥చెప్పి॥
పరిహరించఁగదవే బహునరకబాధలు గరిమల నెటువలెఁ గాచుకున్నవో అరుదుగా సురల మొరాలించితివట తొల్లి ధర నన్ను వహించుకోఁ దగవౌను నీకు	॥చెప్పి॥
వెనుకొని యడ్డము రావే శ్రీవేంకటేశ్వర అనుభవించే కర్మము లవేమున్నవో పనివడి భక్తపరిపాలకుఁడవట నీకు తనుభోగాలు భోగించఁ దగవౌను నీవు	॥చెప్పి॥