ఆంధ్రభారతి - తాళ్లపాక అన్నమాచార్య కీర్తనలు - ఆతనిమూలమే జగమంతా నిది - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 174-1
సంపుటము: 2-362

తాళ్లపాక అన్నమాచార్య

రాగము: లలిత

ఆతనిమూలమే జగమంతా నిది ఆతుమలో హరి కీలు ‌అయివుండుఁ గాని	॥పల్లవి॥
మచ్చరము లేకున్నను మనసే రామరాజ్యము వచ్చినట్టె వచ్చితేను వలపే చవి యెచ్చుకుందు లేకున్న నెక్కడైనా సుఖమే యిచ్చకుఁడై హరి తన కియ్యవలెఁ గాని	॥ఆత॥
నెట్టుకొని నడచితే నిజమే మూలధనము పట్టినదే వ్రతమైతే భవమే మేలు జట్టిగా నొనగూడితే సంసారమే ఫలము యిట్టి హరి దనకు నియ్యవలెఁ గాని	॥ఆత॥
చెప్పినట్లు సేసితేను చేరి దేహమే చుట్టము తప్పులు లేనిదియైతే ధర్మమే సొమ్ము చొప్పున హరిదాసులు సోదించి చూచిన దిది యెప్పుడు శ్రీవేంకటేశుఁ డియ్యవలెఁ గాని	॥ఆత॥