చూడరెవ్వరు దీని సోద్యంబు పరికించి చూడఁజూడఁగఁ గాని సుఖమెఱఁగరాదు	॥చూడ॥
[1]ఎడతెగని మమత వేయఁగరాని పెనుమోపు కడలేని యాస చీఁకటి దవ్వుకొనుట నిడివైన కనుచూపు నీడనుండిన [2]యెండ వడిచెడని తమకంబు వట్టి తాపంబు	॥చూడ॥
బుద్ధిమానిన చింత పోని యూరికిఁ దెరువు పొద్దువోవని వలపు పొట్ట పొంకంబు యెద్దుఁ బట్టిన సివం బెఱుకమాలిన ప్రియము [3]లొద్దిక విహారంబు లుబ్బుఁ గవణంబు	॥చూడ॥
తీపులోపలి తీపు తిరువేంకటేశ్వరుని చూపు, దనుఁ బొడగనని చూపు లోచూపు, ఆపదలు వాయు నెయ్యపుఁ దలఁపు లీ(లో?)తలఁపు రూపైన రుచిలోని రుచి వివేకంబు	॥చూడ॥

---

^[1] ‘ఎడ’ను ‘యడ’గ భావించిరేమో? కాకున్న యతిభంగము.

^[2] ‘యండ’ అని రేకు.

^[3] ‘ఒద్దిక’ పూ.ము.పా.