ఆంధ్రభారతి - తాళ్లపాక అన్నమాచార్య కీర్తనలు - అందాఁకాఁ దాఁ దానే అంత కెక్కుడు గాఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 189-3
సంపుటము: 2-452

తాళ్లపాక అన్నమాచార్య

రాగము: గుజ్జరి

అందాఁకాఁ దాఁ దానే అంత కెక్కుడు గాఁడు ముందువెన కెంచేనా ముఖ్యుఁడే యతఁడు	॥పల్లవి॥
చిత్త మంతర్ముఖము సేసుకొన నేర్చెనా అత్తల నతఁడు యోగియనఁబడును సత్తసత్తనెడి సువిచారంబు గలిగెనా వుత్తమవివేకియని వూహింపఁబడును	॥అందాఁ॥
భావము నభావమును పరికించి తెలిసెనా కైవల్యనిలయుఁడని కానఁబడును దైవంబుఁ దన్ను మతిఁ దలపోయ నేర్చెనా జీవన్ముక్తుఁడని చెప్పఁబడు నతఁడు	॥అందాఁ॥
అడరి వైరాగ్యధన మార్జించనోపెనా దిడువై జితేంద్రియస్థిరుఁడాతఁడు జడియు శ్రీవేంకటేశ్వరుదాసుఁ డాయనా బడిబడిఁ దుదఁ బరబ్రహ్మమే యతఁడు	॥అందాఁ॥