॥ ప్రబంధః - 7 ॥
(ముగ్ధమధుసూదన హంసక్రీడనమ్)
(భూపాళ - ఆది)
ఘూర్జరీ రాగ యతి తాళాభ్యాం గీయతే । |
మా మియం చలితా విలోక్య వృతం వధూ నిచయేన ।
సాపరాధతయా మయాఽపి న వారితాఽతిభయేన ॥
హరి హరి హతాదరతయా గతా సా కుపితేవ ॥ (ధ్రువమ్) ॥ |
కిం కరిష్యతి కిం వదిష్యతి సా చిరం విరహేణ ।
కిం ధనేన జనేన కిం మమ జీవితేన గృహేణ ॥ |
చింతయామి తదాననం కుటిల భ్రూ కోప భరేణ ।
శోణ పద్మమివోపరి భ్రమతాఽఽకులం భ్రమరేణ ॥ |
తామహం హృది సంగతామనిశం భృశం రమయామి ।
కిం వనేఽనుసరామి తామిహ కిం వృథా విలపామి ॥ |
తన్వి ఖిన్నమసూయయా హృదయం తవాకలయామి ।
తన్న వేద్మి కుతో గతాఽసి న తేన తేఽనునయామి ॥ |
దృశ్యసే పురతో గతాగతమేవ మే విదధాసి ।
కిం పురేవ ససంభ్రమం పరిరంభణం న దదాసి ॥ |
క్షమ్యతామపరం కదాపి తవేదృశం న కరోమి ।
దేహి సుందరి! దర్శనం మమ మన్మథేన దునోమి ॥ |
వర్ణితం జయదేవకేన హరేరిదం ప్రవణేన ।
బిందుబిల్వ సముద్ర సంభవ రోహిణీ రమణేన ॥ |
