॥ ప్రబంధః - 11 ॥
(సాకాంక్ష పుండరీకాక్షోత్కంఠా మధురః)
(ఘూర్జరీ - ఏక) (పాడి - )
ఘూర్జరీ రాగేణ ఏకతాళేన గీయతే । |
రతి సుఖ సారే గతమభిసారే మదన మనోహర వేశం ।
న కురు నితంబిని! గమన విళంబన మనుసర తం హృదయేశమ్ ॥
ధీర సమీరే యమునా తీరే వసతి వనే వనమాలీ ।
గోపీ పీనపయోధర మర్దన చంచల కరయుగశాలీ॥ (ధ్రువమ్) ॥ |
నామ సమేతం కృత సంకేతం వాదయతే మృదు వేణుం ।
బహు మనుతే నను తే తనుసంగత పవన చలితమపి రేణుమ్ ॥ |
పతతి పతత్రే విచలతి పత్రే శంకిత భవదుపయానం ।
రచయతి శయనం సచకితనయనం పశ్యతి తవ పంథానమ్ ॥ |
ముఖరమధీరం త్యజ మంజీరం రిపుమివ కేళిషు లోలం ।
చల సఖి! కుంజం సతిమిరపుంజం శీలయ నీల నిచోళమ్ ॥ |
ఉరసి మురారేరుపహిత హారే ఘన ఇవ తరళ బలాకే ।
తటిదివ పీతే! రతి విపరీతే రాజసి సుకృత విపాకే ॥ |
విగళిత వసనం పరిహృత రశనం ఘటయ జఘనమపిధానం ।
కిసలయ శయనే పంకజ నయనే! నిధిమివ హర్ష నిధానమ్ ॥ |
హరిరభిమానీ రజనిరిదానీమియమపి యాతి విరామం ।
కురు మమ వచనం సత్వర రచనం పూరయ మధు రిపు కామమ్ ॥ |
శ్రీ జయదేవే కృత హరి సేవే భణతి పరమ రమణీయం ।
ప్రముదిత హృదయం హరిమతిసదయం నమత సుకృత కమనీయం ॥ |
